Հայաստանին նվիրված մեկամսյակ Իզեր դեպարտամենտում

01 դեկտեմբերի, 2024

2024թ. նոյեմբեր-դեկտեմբեր ամիսներին Իզեր դեպարտամենտ-Գեղարքունիքի մարզ, Վիենն-Գորիս, Գրենոբլ-Սևան համագործակցությունները միավորող IRAPA հարթակի նախաձեռնությամբ և Լիոնում Հայաստանի գլխավոր հյուպատոսության հետ համագործակցաբար անցկացվել է «Հայաստանի մեկամսյակն Իզերում» մշակութային փառատոնը, որի շրջանակներում Վիենն և Գրենոբլ քաղաքներում կազմակերպվել է ավելի քան 60 միջոցառում:

Գլխավոր հյուպատոսության առաջարկով, ծրագրում տեղ են գտել Սերգեյ Փարաջանովի 100-ամյակին նվիրված միջոցառումներ՝ Նռան գույնը ֆիլմի և գլխավոր հյուպատոսության կողմից պատրաստված լուսանկարչական ցուցահանդեսը ցուցադրություն Վիեննում և Գրենոբլում: Ֆիլմերի, կոնֆերանսների, ցուցահանդեսների և համերգների միջոցով ներկայացվել է Փարաջանովի, Ազնավուրի, Թումանյանի, Կոմիտասի արվեստը, խոսվել է Միսակ Մանուշյանի, Հայաստանի և տարածաշրջանի իրավիճակի, Լեռնային Ղարաբաղից հայ ազգաբնակչության բռնի տեղահանման, IRAPA հարթակի կողմից Գեղարքունիքում իրականացվող ծրագրերի մասին, Գրենոբլում բացվել է Մ. Մանուշյանին և նրա խմբին նվիրված որմնանկար:

Մեկամսյակի առիթով, Վիենն և Գրենոբլ են այցելել Գեղաքունիքի մարզպետ Կարեն Սարգսյանի, Սևան համայնքի ղեկավար Սարգիս Մուրադյանի և Գորիս համայնքի ղեկավարի խորհրդական Կարեն Ջավահիրյանի գլխավորած պատվիրակությունները:

Ընթացիկ և առաջիկա համագործակցության ծրագրերի քննարկման նպատակով կազմակերպվել է IRAPA հարթակի կոմիտեի նիստը՝ Ֆրանսիայի Եվրոպայի և արտաքին գործերի նախարարությունում Հայաստանի հետ ապակենտրոնացված ծրագրերի համակարգող Ֆլորանս Պրովանդիեի մասնակցությամբ:

Փառատոնի ընթացքում տարբեր բացման արարողությունների և միջոցառումներ են մասնակցել Իզերի դեպարտամենտի նախագահ Ժան-Պիեռ Բարբիեն և նրա տեղակալ Պատրիկ Կուրտոն, Վիեննի քաղաքապետ, ՕՌԱ ռեգիոնի փոխնախագահ Թիերի Կովաքսը և քաղաքապետի տեղակալ Լևոն Սաքունցը, Գրենոբլի քաղաքապետ Էրիկ Պիոլը, տեղական մարմինների բազմաթիվ ներկայացուցիչներ:

Նոյեմբերի 5-ին Լիոնում Հայաստանի գլխավոր հյուպատոս Նարինե Նիկոլյանը մասնակցել և ելույթով հանդես է եկել Վիենն քաղաքում մշակութային մեկամսյակի բացման արարողությանը, որին մասնակցել է Վիեննի քաղաքապետ, ՕՌԱ ռեգիոնի փոխնախագահ Թիերի Կովաքսը: Նոյեմբերի 8-ին Լիոնում գլխավոր հյուպատոսը մասնակցել և ելույթով հանդես է եկել Իզեր դեպարտամենում և Գրենոբլ քաղաքում մշակութային մեկամսյակի, իսկ դեկտեմբերի 1-ին՝ Գրենոբլում Սերգեյ Փարաջանովի 100-ամյակին նվիրված լուսանկարչական ցուցահանդեսի բացման արարողություններին:

Ի տեղեկություն. IRAPA հարթակ մասնակիորեն ֆինանսավորվում է Ֆրանսիայի Եվրոպայի և արտաքին գործերի նախարարության կողմից: Համագործակցության գերակա ուղղություններն են էկոտուրիզմի զարգացումը, ֆրանկոֆոնիայի տարածումը, մշակութային ծրագրերը, առողջապահությունը, ինստիտուցիոնալ կարողությունների զարգացումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր