Լիոնում Հայաստանի Գլխավոր հյուպատոսությունը մասնակցեց Լիոնի ամենամյա հյուպատոսական տոնին

16 հունիսի, 2025

Հունիսի 14-15-ին, Լիոնի կենտրոնական Բելկուր հրապարակում Լիոնի քաղաքապետարանի նախաձեռնությամբ անցկացվեց Հյուպատոսական ամենամյա տոնը՝ «Մեր երկրների բնական և ճարտարապետական գանձերը» ընդհանուր խորագրով: Հյուպատոսական տոնի նախորդող օրը՝ հունիսի 13-ին Լիոնի քաղաքապետ Գրեգորի Դուսեի հրավերով քաղաքապետարանում տեղի ունեցավ ընդունելություն, որին մասնակցեցին Ֆրանսիայում հավատարմագրված և տոնի առիթով Լիոն ժամանած դեսպանները և Լիոնի հյուպատոսական կորպուսը:

Տոնին մասնակցեցին Լիոնում գործող հյուպատոսություններն ու կազմակերպությունները՝ հինգ տասնյակ տաղավարով:

Հայաստանի Գլխավոր հյուպատոսության տաղավարում ներկայացվեցին Հայաստանի բոլոր տաս մարզերի և Երևանի բնապատկերները և պատմա-մշակութային հուշարձանները, նկարազարդ ֆրանսերեն լեզվով ալբոմներ և հուշանվերներ, տոնի թեմայով ֆիլմ: Լիոնի «Նաիրի» պարախումբը ելույթ ունեցավ հյուպատոսական տոնի կենտրոնական բեմում:

Հայաստանի տաղավար այցելեցին Լիոնի քաղաքապետ Գրեգորի Դուսեն, վերջինիս տեղակալ Սոնյա Զդորովցոֆը՝ քաղաքապետարանի աշխատակիցների, Լիոնի հյուպատոսական կորպուսի դուայեն, Կոտ-դ'Իվուարի Գլխավոր հյուպատոս Լամբեր-Էզոա Ակայի և Գլխավոր քարտուղար, Էստոնիայի պատվո հյուպատոս Հյուգ Պուզեի ուղեկցությամբ, Լիոնի նախկին քաղաքապետ Ժորժ Կեպենեկյանը, Լիոնի մետրոպոլիայի փոխնախագահ Հելեն Դյուվիվիե-Դրոմենը, Լիոնի երկրորդ թաղամասի քաղաքապետ Պիեր Օլիվերը, Վիլյորբանի քաղաքային խորհրդի անդամ Իկլեֆ Շիխը, Օվերն-Ռոն-Ալպ ռեգիոնի պրեֆեկտի դիվանագիտական խորհրդական Լուի Ռիքեն, դեսպաններ և հյուպատոսներ:

Տոնի օրերին Հայաստանի տաղավարը մարդաշատ էր և մեծ հետաքրքրություն էր առաջացրել այցելուների շրջանում, որոնց մեջ մեծ թիվ էին կազմում տարբեր երկրներից Լիոն այցելած զբոսաշրջիկները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր