Հանդիպում Ֆրանսիայի ամառային դիվանագիտական ակադեմիայի շրջանավարտների հետ

20 հոկտեմբերի, 2025

Հոկտեմբերի 20-ին Լիոնում Հայաստանի գլխավոր հյուպատոս Նարինե Նիկոլյանը Գլխավոր հյուպատոսությունում ընդունել է Ֆրանսիայի Եվրոպայի և արտաքին գործերի նախարարության ամառային դիվանագիտական ակադեմիայի մի խումբ շրջանավարտների։

Գլխավոր հյուպատոսը ներկայացրել է Հայաստանի արտաքին քաղաքականությունը և հարևան երկրների հետ հարաբերությունները: Անդրադարձ է կատարվել օգոստոսի 8-ին Վաշինգտոնում Հայաստանի, Ադրբեջանի և ԱՄՆ ղեկավարների կողմից ստորագրված հռչակագրին և դրա կարևորությանը Հարավային Կովկասում խաղաղության հաստատման գործում։ Խոսվել է նաև Հայաստանի Հանրապետության և Ֆրանսիայի հանրապետության միջև միջպետական համագործակցության, ինչպես նաև հայ-ֆրանսիական պատմական առնչությունների մասին:

Հանդիպման ավարտին Գլխավոր հյուպատոսը պատասխանել է մասնակիցների հարցերին՝ անդրադառնալով նաև Եվրոպական միության և միջազգային այլ կառուցների հետ Հայաստանի հարաբերություններին և առաջիկա տարիներին Հայաստանում կայանալիք միջազգային խոշոր իրադարձություններին:

Ի տեղեկություն. Ֆրանսիայի ամառային դիվանագիտական ակադեմիան հիմնադրվել է 2021թ. Ֆրանսիայի Եվրոպայի և արտաքին գործերի նախարարության կողմից՝ տարեկան 100 ուսանողների հնարավորություն տալով բացահայտել դիվանագետի մասնագիտությունը և դիվանագիտական ծառայությունը: Ակադեմիայի ունկնդիրներն ընտրվում են մրցույթի հիման վրա: Ամառային դիվանագիտական ակադեմիան նորաստեղծ Դիվանագիտական և հյուպատոսական ակադեմիայի մաս է կազմում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր