Երևանի Չայկովսկու անվան երաժշտական դպրոցի նվագախմբի համերգը Լիոնում

22 փետրվարի, 2026

Փետրվարի 22-ին, Լիոնում Հայաստանի գլխավոր հյուպատոսության բարձր հովանու ներքո, Լիոնի Սեն-Մարտեն դ’Էնե տաճարում կայացավ Երևանի Չայկովսկու անվան երաժշտական դպրոցի նվագախմբի (գեղարվեստական ղեկավար և դիրիժոր՝ Դավիթ Մարուխյան, տնօրեն՝ Մարտունի Կոստանդյան) և Վալանս Ռոման Ագլո կոնսերվատորիայի դուդուկի դասարանի սաների (դասախոս՝ Լևոն Չատիկյան) համերգը:

Համերգը նախաձեռնել էր «Ֆրանսիա Աշտարակ–Հայաստան» մշակութային միությունը՝ Հայաստանի Հանրապետության կրթության, գիտության, մշակույթի և սպորտի նախարարության, Օվերն-Ռոն-Ալպ ռեգիոնի, Վալանս Ռոման Ագլոյի, Վալանս Ռոման Ագլո կոնսերվատորիայի և Երևանի Չայկովսկու անվան երաժշտական դպրոցի տնօրենների, Ժակ և Անի Մարկարյանների աջակությամբ:

Մշակույթների երկխոսության և բարեկամության նշանաբանի ներքո անցկացված երաժշտական երեկոյի հյուրերի թվում էին Ֆրանսիայի ազգային, ռեգիոնալ, մետրոպոլիտենի և մունիցիպալ մակարդակների ընտրված պաշտոնյաներ, Լիոնի հյուպատոսական կորպուսի ներկայացուցիչներ, Հայաստանի հետ գործընկերություն ունեցող ֆրանսիական հաստատությունների բարձրաստիճան ներկայացուցիչներ և պաշտոնյաներ, Ֆրանսիայի հայկական հաստատությունների և կազմակերպությունների ներկայացուցիչներ, ինչպես նաև «Լիոնի փոքրիկ երգիչներ» երգչախմբի անդամներ :

Չայկովսկու անվան երաժշտական դպրոցի երիտասարդ երաժիշտները և դուդուկի դասարանի սաները կատարեցին Կոմիտասի, Ներսես Շնորհալու, Արամ Խաչատրյանի, Առնո Բաբաջանյանի, Էդգար Հովհաննիսյանի, Ժորժ Բիզեի, Ռոդիոն Շչեդրինի և այլ կոմպոզիտորների ստեղծագործությունները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր