Լիոնում ՀՀ Գլխավոր հյուպատոսը մասնակցեց Ֆրանսիայի դիմադրության շարժման ազգային խորհրդի հիմնադիր Ժան Մուլենի ձերբակալման 80-րդ տարելիցին նվիրված պաշտոնական միջոցառմանը

21 հունիսի, 2023

Հունիսի 21-ին Լիոնում ՀՀ Գլխավոր հյուպատոս Նարինե Նիկոլյանը ներկա գտնվեց Ֆրանսիայի դիմադրության շարժման ազգային խորհրդի հիմնադիր Ժան Մուլենի և շարժման այլ անդամների ձերբակալության 80-րդ տարելիցին նվիրված՝ Լիոնի Մոնտլյուք բանտի հուշահամալիրի մոտ կայացած միջոցառմանը, որը կազմակերպվել էր Օվերն-ռոն-Ալպեր շրջանի պրեֆեկտուրայի կողմից:

Միջոցառման ընթացքում, Ժան Մուլենի անունը կրող քոլեջի աշակերտներն ընթերցեցին դիմադրության շարժման խորհրդի հիմնադրի և նրա հետ ձերբակալված դիմադրության շարժման անդամներ Անրի Օբրիի, Ֆրեդերիկ Դուգուժոնի, Ալբեր Լակազի, Բրյունո Լարայի, Անդրե Լասանի և Էմիլ Շվարցֆիլդի կենսագրությունները։ Նրանց հիշատակին նվիրված հուշատախտակի բացումը կատարեց պրեֆեկտ Ֆաբիեն Բուսիոն, ով նաև հանդես եկավ ելույթով:

Միջոցառումից հետո ՀՀ Գլխավոր հյուպատոսի հետ ունեցած կարճատև զրույցի ընթացքում, Ֆաբիեն Բուսիոն հիշատակեց դիմադրության շարժման ակտիվ անդամ Միսակ Մանուշյանին Փարիզի Պանթեոնում ամփոփելու մասին Ֆրանսիայի նախագահի հունիսի 18-ին հրապարակված որոշումը՝ նշելով, որ վերջինս արժանի է ֆրանսիական պետության նման գնահատականին:

Ծանոթություն. Ժան Մուլենը ձերբակալվել է 1943 թվականի հունիսի 21-ին Կալուիր-է-Կուիր բնակավայրում, այնուհետև՝ տեղափոխվել է Լիոնի Մոնտլյուք բանտ: Մահացել է Գերմանիա տեղափոխվելու ճանապարհին՝ խոշտանգումից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր