Լիոնում ՀՀ Գլխավոր հյուպատոսը և փոխհյուպատոսը մասնակցել են Դանիել Մարանջյանին Գրենոբլ քաղաքի ոսկե մեդալի հանձնման արարողությանը

30 հունիսի, 2023

Հունիսի 30-ին, Լիոնում ՀՀ Գլխավոր հյուպատոս Նարինե Նիկոլյանը և փոխհյուպատոս Կարինե Վարդանյանը մասնակցեցին Գրենոբլ-Դոֆինեի Հայկական մշակույթի տան նախագահ Դանիել Մարանջյանին քաղաքի ոսկե մեդալի հանձնման արարողությանը:

Արարողությունը տեղի ունեցավ Գրենոբլի քաղաքապետարանում՝ քաղաքապետ Էրիկ Պիոլի մասնակցությամբ: Վերջինս իր ելույթում խոսեց Դանիել Մարանջյանի և նրա ղեկավարած մշակույթի տան գործունեության մասին, որի հիմնադրման 40-ամյակը նշվել է այս տարի: Դանիել Մարանջյանը մանրամասն ներկայացրեց իր անցած ուղին և իր ընտանիքի պատմությունը:

ՀՀ Գլխավոր հյուպատոսն իր ելույթում շնորհավորեց Դանիել Մարանջյանին քաղաքի բարձր գնահատականին արժանանալու կապակցությամբ՝ հաջողություն մաղթելով հետագա ծրագրերի իրականացման համար: Ն. Նիկոլյանը խոսեց նաև հայ-ֆրանսիական առանձնաշնորհյալ հարաբերությունների, ինչպես նաև Ադրբեջանի կողմից Լաչինի միջանցքի արգելափակման հետևանքով Արցախում ստեղծված իրավիճակի մասին:

Երեկոյի ընթացքում պարային կատարումներով հանդես եկավ Գրենոբլ-Դոֆինեի մշակույթի տան «Երևան» պարախումբը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր