Լիոնում ՀՀ Գլխավոր հյուպատոսը հանդիպել է Օվերն-Ռոն-Ալպեր շրջանի պրեֆեկտի տեղակալի հետ

03 հուլիսի, 2023

Հուլիսի 3-ին, Լիոնում ՀՀ Գլխավոր հյուպատոս Նարինե Նիկոլյանն այցելեց Օվերն-Ռոն-Ալպեր շրջանի պրեֆեկտուրա, որտեղ կայացավ հանդիպում պրեֆեկտի տեղակալ, գրասենյակի ղեկավար Էմանուել Դարմոնի հետ, ով ժամանակավորապես կատարում է պրեֆեկտի դիվանագիտական խորհրդականի պարտականությունները:

Գլխավոր հյուպատոսն ընդհանուր ներկայացրեց հայ-ֆրանսիական հարաբերությունները և Օվերն-Ռոն-Ալպեր շրջանի հետ համագործակցության ուղղությունները, խոսեց Հարավային Կովկասի անվտանգային հարցերի, Լեռնային Ղարաբաղի և Լաչինի միջանցքի հետ կապված իրավիճակի մասին: Անդրադարձ կատարվեց Եվրոպական Միության, Եվրոպայի Խորհրդի և Ֆրանկոֆոնիայի միջազգային կազմակերպության շրջանակներում աշխատանքներին, մասնավորապես՝ 2014թ. հունվարի 1-ին ուժի մեջ մտած «Հայաստանի Հանրապետության և Եվրոպական միության միջև մուտքի արտոնագրերի տրամադրումը դյուրացնելու մասին» և «Հայաստանի Հանրապետության և Եվրոպական միության միջև առանց թույլտվության բնակվող անձանց հետընդունման մասին» համաձայնագրերին և դրանց առնչվող գործնական հարցերին:

Պրեֆեկտի տեղակալի խնդրանքով, ՀՀ Գլխավոր հյուպատոսը հակիրճ ներկայացրեց Լիոնում ՀՀ Գլխավոր հյուպատոսության կողմից մատուցվող հյուպատոսական ծառայությունները:

Հաշվի առնելով Ֆրանսիայում, ներառյալ Լիոնում և մերձակա քաղաքներում վերջին օրերին ստեղծված լարված իրավիճակը՝ ՀՀ Գլխավոր հյուպատոսը վստահություն հայտնեց, որ իրավիճակը մոտ ժամանակներում կկարգավորվի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր