Ֆրանսիայի Պրիվա և Հայաստանի Աշտարակ քաղաքների միջև ստորագրվել է «Բարեկամության համաձայնագիր»

01 օգոստոսի, 2023

Լիոնում ՀՀ Գլխավոր հյուպատոս Նարինե Նիկոլյանը Ֆրանսիայի Պրիվա քաղաքի քաղաքապետ Միշել Վալլայի հրավերով օգոստոսի 1-ին մասնակցել է Պրիվա և Աշտարակ քաղաքների միջև «Բարեկամության համաձայնագրի» ստորագրման արարողությանը: Միջոցառմանը մասնակցում էին և ելույթով հանդես եկան Պրիվայի քաղաքապետ Միշել Վալլան (Michel Valla), Աշտարակի քաղաքապետ Թովմաս Շահվերդյանը, Պրիվայի քաղաքապետի առաջին տեղակալ և Օվերն-Ռոն-Ալպեր շրջանի շրջանային խորհրդի անդամ Իզաբել Մասըբյոֆը (Isabelle Massebeuf), Վալանսի փոխքաղաքապետ Ժորժ Ռաստկլանը (Georges Rastklan) և Պրիվայում բնակվող ֆրանսահայերի ներկայացուցիչը: Ներկա էին երկու քաղաքների քաղաքային խորհրդի անդամները, Վալանսի և շրջակա քաղաքների Հայ առաքելական եկեղեցու հոգևոր հովիվ Հայր Անդրանիկ ավագ քահանա Մալջյանը, Վալանսի Հայ Ավետարանական եկեղեցու հովիվ, պատվելի Հակոբ Կոճիկեանը, Պրիվայի, Վալանսի և շրջակա քաղաքների հայ համայնքի և տեղական մամուլի ներկայացուցիչները:

Ողջունելով ներկաներին՝ Պրիվայի քաղաքապետը ներկայացրեց Աշտարակի հետ բարեկամության կապերի նախապատմությունը, որը սկիզբ է առել Վալանսի քաղաքապետ Նիկոլա Դարագոնի գլխավորած ֆրանսիական պաշտոնական պատվիրակության՝ 2022թ. հոկտեմբերի 8-16-ին Հայաստան այցի առիթով: Միշել Վալլան ներկայացրեց իր քաղաքը, խոսեց Աշտարակի հետ համագործակցության հնարավոր ոլորտների մասին, ինչպես նաև անդրադարձավ Լեռնային Ղարաբաղում ստեղծված իրավիճակին:

Աշտարակի քաղաքապետ Թովմաս Շահվերդյանը, շնորհակալություն հայտնելով հյուրընկալության համար, գոհունակություն արտահայտեց Պրիվայի հետ ստեղծվող համագործակցության կապակցությամբ:

Օվերն-Ռոն-Ալպեր շրջանի շրջանային խորհրդի անդամ Իզաբել Մասըբյուֆը խոսեց շրջանի նախագահ Լորան Վոքյեի (Laurent Wauquiez)՝ 2023թ. մարտին Հայաստան կատարած այցի մասին: Վալանսի քաղաքապետ Նիկոլա Դարագոնի (Nicolas Daragon) անունից ներկաներին ողջունեց և նորաստեղծ բարեկամությանը հաջողություն մաղթեց Վալանսի փոխքաղաքապետ Ժորժ Ռաստկլանը:

Շնորհավորելով երկու քաղաքներին համագործակցության կապերի ստեղծման կապակցությամբ՝ ՀՀ Գլխավոր հյուպատոսը շնորհակալություն հայտնեց Պրիվայի քաղաքապետին հայ ժողովրդի հանդեպ բարեկամության այդ արտահայտության, ինչպես նաև 2023թ. ապրիլի 23-ին Պրիվայում հայոց ցեղասպանության զոհերի հիշատակը հավերժացնող հուշարձանի տեղադրման համար, ներկայացրեց հայ-ֆրանսիական միջպետական կապերը՝ առանձնացնելով ապակենտրոնացված համագործակցությունը, որը տարեցտարի ընդլայնվում է: Ներկայացնելով Արցախում ստեղծված աղետալի իրավիճակը՝ Գլխավոր հյուպատոսը խոսեց Ադրբեջանում մինչ օրս պատանդի կարգավիճակում պահվող հայ ռազմագերիների, Արցախում ոչնչացվող հայկական պատմա-մշակութային կոթողների մասին, ընդգծեց, որ Ադրբեջանն Արցախի 120.000 հայ բնակչության նկատմամբ վարում է էթնիկ զտման քաղաքականություն, կոպտորեն ոտնահարում է իր միջազգային պարտավորությունները և շարունակաբար անտեսում՝ Լաչինի միջանցքն անհապաղ բացելու վերաբերյալ միջազգային իրավասու կառույցների որոշումներն ու միջազգային հանրության կոչերը:

Ծանոթություն. Ֆրանսիայի Պրիվա քաղաքն Օվերն-Ռոն-Ալպեր շրջանի Արդեշ դեպարտամենտի կենտրոնն է: Քաղաքային խորհուրդը կազմված է 29 անդամից: Պրիվայում է գտնվում Արդեշ դեպարտամենտի խորհուրդը և պրեֆեկտուրան: Ունի հիվանդանոց, սպորտային կառույցներ: Տնտեսական առումով, հայտնի են Պրիվայի Klément Faugier գործարանը, որն արտադրում է շագանակի կրեմ և այծի պանրի արտադրությամբ զբաղվող ընկերությունները: Բնակչության թիվը կազմում է 8.567:

2023թ. ապրիլի 23-ին Պրիվայում տեղադրվել է հայոց ցեղասպանության զոհերի հիշատակը հավերժացնող խաչքար, որն առաջինն է Արդեշում:

Պրիվայի և Աշտարակի միջև ստորագրված «Բարեկամության համաձայնագիրը» նախատեսում է համագործակցության ծրագրեր իրականացնել զբոսաշրջության, մշակույթի, սպորտի, շրջակա միջավայրի, սոցիալական, առողջապահության, գյուղատնտեսության և տնտեսական ոլորտներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր