Լիոնում Հայաստանի Գլխավոր հյուպատոսը ներկա է եղել բարեգործական հավաքին

06 հունվարի, 2024

Հունվարի 6-ին, Լիոնում Հայաստանի Գլխավոր հյուպատոս Նարինե Նիկոլյանն այցելել է Լիոնի մերձակա Դեսին քաղաք, որի ընդարձակ սրահներից մեկում՝ Halles Décinoises-ում, կազմակերպվել էր Սուրբ Ծննդյան մեծ բարեգործական միջոցառում՝ Լեռնային Ղարաբաղից բռնի տեղահանված անձանց համար Ֆրանսիայի Հայկական հիմնադրամի կողմից իրականացվող ծրագրերին սատարելու նպատակով:

Միջոցառումը նախաձեռնել էին Ֆրանսիայում հայտնի հայազգի խոհարարներ Ալեն Ալեքսանյանը, Ժերար Եսայանը և Սոնյա Եզգուլյանը՝ աստղակիր խոհարար Ռեժի Մարկոնի և Դեսին քաղաքային իշխանությունների բարձր հովանու ներքո:

Միջոցառման այցելուների թիվը գերազանցել է 900-ը՝ սպասված 400-ի փոխարեն, այդ թվում՝ Ֆրանսիայի Ազգային ժողովի պատգամավոր Սառա Տանզիլին, Դեսինի քաղաքապետ Լորանս Ֆոթրան և քաղաքապետի տեղակալ Դենի Ջորկայեֆը, Վիլյորբանի քաղաքպետ Սեդրիկ Վան Սթիվենդաելը, Լիոնի մետրոպոլիայի փոխնախագահ Հելեն Դյուվիվե-Դրոմենը, տեղական ընտրովի մարմինների և գործարար շրջանակների ներկայացուցիչներ: Վաճառքից գոյացած ողջ հասույթը փոխանցվել է Ֆրանսիայի հայկական հիմնադրամին:

Հայաստանի Գլխավոր հյուպատոսը շնորհակալություն է հայտնել բարեգործական հավաքի նախաձեռնողներին, կազմակերպիչներին, նվիրատուներին և բոլոր այցելուներին՝ նշելով, որ հավաքի հաջողությունը վկայում է հայ ժողովրդի և հատկապես Լեռնային Ղարաբաղի մեր եղբայրների ու քույրերի հետ մեծ համերաշխության մասին, ովքեր Սուրբ Ծնունդը ստիպված եղան տոնել իրենց տներից ու պապենական հողից հեռու։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր