ՀՐԱՆՏ ԴԻՆՔԻՆ ՆՎԻՐՎԱԾ ՀԻՇԱՏԱԿԻ ՄԻՋՈՑԱՌՈՒՄ ԼԻՈՆՈՒՄ

19 հունվարի, 2024

«Ակոս» թերթի գլխավոր խմբագիր, պոլսահայ լրագրող Հրանտ Դինքի սպանության օրը՝ հունվարի 19-ին, Լիոնի երկրորդ թաղամասի նրա անունը կրող փողոցի հուշատախտակի մոտ կայացավ հիշատակի միջոցառում՝ Հայկական բարեգործական ընդհանուր միության Լիոնի մասնաճյուղի նախաձեռնությամբ:

Միջոցառմանը ներկա էին Եվրոպական խորհրդարանի ֆրանսիացի պատգամավոր Սիլվի Գիյոմը (Sylvie Guillaume), Ֆրանսիայի ազգային ժողովի Ռոնից ընտրված պատգամավոր Մարի-Շառլոտ Գարենը (Marie-Charlotte Garin), Լիոնի երկրորդ թաղամասի քաղաքապետ Պիեր Օլիվերը (Pierre Oliver), Լիոնում ՀՀ գլխավոր հյուպատոս Նարինե Նիկոլյանը, Լիոնի մամուլի ակումբի նախագահ Ժան-Պիեր Վաշեն (Jean-Pierre Vacher), ՀԲԸՄ Լիոնի մասնաճյուղի անունից՝ «Նուվել դ'Արմենի-Nouvelles d'Arménie» պարբերականի թղթակից, Լիոնի մամուլի ակումբի նախկին նախագահ Ժանին Պալուլյանը (Jeanine Paloulian), իրավապաշտպան կազմակերպությունների, ֆրանսահայ միությունների և հայ համայնքի ներկայացուցիչներ: Պատվավոր հյուրի կարգավիճակով, միջոցառմանը ներկա էր Հրանտ Դինքի բարեկամ, վտարանդի թուրք ակտիվիստ, գրող, սոցիոլոգ, Կոտ-դ'Ազյուրի համալսարանի դասախոս Փընար Սելեկը:

Ելույթներով հանդես եկան ՀԲԸՄ Լիոնի մասնաճյուղի ներկայացուցիչը, Լիոնի մամուլի ակումբի նախագահը, Լիոնում ՀՀ գլխավոր հյուպատոսը և պատվավոր հյուրը: Հուշատախտակի մոտ ծաղկեպսակներ դրվեցին Լիոնի երկրորդ թաղամասի քաղաքապետի, Լիոնում ՀՀ գլխավոր հյուպատոսության և Հրանտ Դինքի բարեկամների անունից:

ՀՀ գլխավոր հյուպատոսը խոսեց Հրանտ Դինքի գործունեության որոշ դրվագների մասին, ինչպես նաև անդրադարձավ Ադրբեջանի կողմից Լեռնային Ղարաբաղի հայերի էթնիկ զտման փաստին և Հայաստանին ներկայում սպառնացող վտանգներին ու մարտահրավերներին:

Ծանոթություն՝ Հրանտ Դինքի անունը կրող փողոցը գտնվում է Լիոնի երկրորդ թաղամասի Կոնֆլյուանս կոչվող տարածքում, որտեղ տեղակայված են տեղական լրատվամիջոցների նստավայրերը: Փողոցի անվանակոչման մասին որոշումը կայացվել է Լիոնի քաղաքային խորհրդի կողմից 2008թ. հունվարի 14-ին՝ քաղաքապետ Ժերար Կոլոնի (Gérard Collomb) և փոխքաղաքապետ Ժան-Իվ Սեշըրեսի (Jean-Yves Sécheresse) աջակցությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր