Հանդիպում Ռոնի մասնագիտական կրթության ընկերության նախագահի և գլխավոր տնօրենի հետ

05 փետրվարի, 2024

Փետրվարի 5-ին, Լիոնում Հայաստանի գլխավոր հյուպատոս Նարինե Նիկոլյանը հյուպատոսությունում ընդունել է Ռոնի մասնագիտական կրթության ընկերության նախագահ Քրիստիան Դրոզին և գլխավոր տնօրեն Վերոնիկ Ֆուրլանին: Քննարկվել են Երևանում գործող Ֆրանս-հայկական մասնագիտական կրթության կենտրոն հիմնադրամի հետ համագործակցության և առաջիկա ծրագրերի, ինչպես նաև և Հայաստանի տարբեր շրջաններում այդ կենտոնի գործունեության ընդլայնման հարցերը:

Ծանոթություն՝

Ֆրանս-հայկական մասնագիտական կրթության կենտրոն հիմնադրամը (Fondation Centre d’Enseignement Professionnel France-Arménien - SEPFA) հիմնադրվել է 2001թ., պաշտոնապես բացվել է 2002թ. հունիսի 21-ին՝ ՀՀ կրթության նախարարի, Հայաստանում Ֆրանսիայի դեսպանի, Երևանի և Լիոնի քաղաքապետերի կողմից: Տնօրենների խորհուրդը կազմված է Հայաստանի և Ֆրանսիայի հետևյալ մարմիններից. ՀՀ Կրթության, գիտության, մշակույթի և սպորտի նախարարություն, ՀՀ աշխատանքի և սոցիալական հարցերի նախարարություն, Լիոն Մետրոպոլ /նախկինում՝ Ռոն դեպարտամենտ/, Լիոն և Երևան քաղաքներ, Ռոնի մասնագիտական կրթության ընկերություն (SEPR), Ռոն-Հայաստան՝ կրթություն-փոխանակում միություն (RAFE) և Հայկական ալիանս հիմնադրամ (Fondation Alliance Arménienne): ՀՀ աշխատանքի և սոցիալական հարցերի նախարարությունը SEPFA-ի անդամ է 2008թ.-ից:

Մասնագիտական կրթության հարցում SEPFA-ի գործընկերը SEPR-ն է: SEPFA-ն գործում է կամավոր նվիրատվությունների, SEPR-ի ֆինանսավորման, աշակերտների ուսման վարձի շնորհիվ: Նվիրատուների թվում են Ֆրանսիայի համայնքայի կառույցները, ֆրանսահայ գործարարներ, 2004թ.-ից՝ Ժնևի Հայկական ալյանս հիմնադրամը: Ֆրանսիական կողմից նշանակալի մասնակցություն և աջակցություն են ցուցաբերել Լիոնի քաղաքապետարանը, Լիոն Մետրոպոլը, Օվերն-Ռոն-Ալպեր շրջանը, Ֆրանսիայի Սենատը և Արտաքին գործերի նախարարությունը:

Ծրագրվում է մասնաճյուղեր հիմնել Հայաստանի 4 մարզերում՝ Սյունիք, Շիրակ, Տավուշ և Լոռի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր