ՀԱՅԿԱԿԱՆ ԳԻՆԻՆԵՐԸ ԼԻՈՆՈՒՄ ԿԱՅԱՑԱԾ ԱՌԱՋԻՆ ՀԱՄՏԵՍ-ԵՐԵԿՈՅԻՆ

15 փետրվարի, 2024

Փետրվարի 15-ին, Լիոնում Հայաստանի գլխավոր հյուպատոսությունը մասնակցեց Լիոնի 6-րդ թաղամասի քաղաքապետարանում կայացած գինեգործությանը նվիրված առաջին համտես-երեկոյին, որին մասնակցելու էին հրավիրվել Լիոնում գործող հյուպատոսությունները:

Երեկոն սկսվեց մասնակից երկրների ներկայացմամբ, որից հետո պատմական գիտությունների դոկտոր Ֆաբիեն Գավոն (Dr Fabien Gaveau) ներկայացրեց Լիոն քաղաքի գինեգործական ավանդույթները՝ «Աշխարհը մի բաժակի մեջ. խաղողի տեսակներն ու համերը խցանների երկրում» խորագրով կոնֆերանսի շրջանակներում:

Երեկոյի երկրորդ մասում, մոտ երեք տասնյակ հյուպատոսություններ հյուրերին հրամցրեցին իրենց երկրների գինիները և այլ ոգելիչ խմիչքները: Հայաստանի գլխավոր հյուպատոսությունը, Լիոնում գործող գինիների ներմուծմամբ զբաղվող DELICE’IK ընկերության և Ֆրանս-հայկական ՄԵՆՔ գործարարների ցանցի աջակցության շնորհիվ, ներկայացրեց «Armenia Wine Company»-ի YEREVAN կարմիր գինին և «Tierras de Armenia» -ի սպիտակ KARAS-ը, որոնք երկուսն էլ մեծ հաջողություն ունեցան:

Այցելուներին բաժանվեցին Հայաստանի գինեգործական ավանդույթների վերաբերյալ երեկոյի համար հատուկ պատրաստված տեղեկատվական բուկլետներ և Հայաստանի զբոսաշրջային գրավչությունը ներկայանող գրքույկներ:

Հայաստանի գինիները համտեսեցին Լիոնի 6-րդ թաղամասի քաղաքապետ Պասկալ Բլաշը (Pascal Blache), փոխքաղաքապետ Քրիստիան Տերմո-Մազանը (Christian Termoz-Mazan), Ֆրանս-իտալական առևտրային պալատի նախագահը և Գլխավոր քարտուղարը, Լիոնի մետրոպոլիայի և հյուպատոսական կորպուսի ներկայացուցիչները, այլ հրավիրյալներ: Դոկտոր Ֆաբիեն Գավոն համտեսեց YEREVAN կարմիր գինին և իբրև մասնագետ շատ բարձր գնահատեց հայ գինեգործների արտադրանքը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր