ՀԱՅՈՑ ՑԵՂԱՍՊԱՆՈՒԹՅԱՆ 109-ՐԴ ՏԱՐԵԼԻՑԻՆ ՆՎԻՐՎԱԾ ԱՐԱՐՈՂՈՒԹՅՈՒՆ ՎԻԼՅՈՐԲԱՆ ՔԱՂԱՔՈՒՄ

22 ապրիլի, 2024

Ապրիլի 22-ին՝ Ֆրանսիայի Օվերնյ-Ռոն-Ալպեր շրջանում Հայոց ցեղասպանության ոգեկոչման միջոցառումների շրջանակում, Լիոնում Հայաստանի գլխավոր հյուպատոս Նարինե Նիկոլյանը մասնակցեց Լիոնի մերձակա Վիլյորբան (Villeurbanne) քաղաքում Հայոց ցեղասպանության 109-րդ տարելիցին նվիրված արարողությանը։

Հայոց ցեղասպանության զոհերի հիշատակը հավերժացնող հուշահամալիրի առջև տեղի ունեցած ոգեկոչման միջոցառումը մեկնարկեց լռության րոպեով։ Հուշարձանի առջև ծաղկեպսակներ խոնարհեցին Լիոնում Հայաստանի գլխավոր հյուպատոսը, Օվերնյ-Ռոն-Ալպեր շրջանի պրեֆեի անունից՝ ենթապրեֆե Վանինա Նիկոլին, Վիլյորբանիի քաղաքապետ Սեդրիկ Վան Ստիվենդաելը և քաղաքային խորհրդի անդամ Ֆրեդերիկ Վերմյոլենը, Լիոնի մետրոպոլիայի փոխնախագահ Զեմորդա Խոլիֆին, ՕՌԱ շրջանի հրեական կազմակերպությունը, Ֆրանսահայ կազմակերպությունների համակարգող խորհրդի կենտրոն մասնաճյուղը, Դեսինի հայկական հիշողության ազգային կենտրոնը, Վիլյորբանի հայ մշակույթի տունը:

Հիշատակի միջոցառումը շարունակվեց Վիլյորբանի քաղաքապետարանի սրահում: Ելույթներով հանդես եկան Լիոնում Հայաստանի գլխավոր հյուպատոսը, Վիլորբանի քաղաքապետը, համայնքային կառույցների և միությունների ներկայացուցիչները: Միջոցառմանը ներկա էին Վիլյորբանի նախկին քաղաքապետ Ժան-Պոլ Բրետը, Լիոնի մետրոպոլիայի այլ քաղաքների քաղաքային խորհուրդների անդամներ:

Վիլյորբանի հայկական մշակույթի տան սաների կատարմամբ, հնչեցին Հայաստանի Հանրապետության և Ֆրանսիայի Հանրապետության օրհներգերը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր