Բարեկամության հուշագրի ստորագրում Մեյզիո և Հրազդան քաղաքների միջև

22 ապրիլի, 2024

2024թ. ապրիլի 22-ին, Լիոնի մետրոպոլիայի Մեյզիո քաղաքի քաղաքապետարանի հանդիսությունների սրահում կայացավ Մեզիոյի և Հրազդանի միջև «Բարեկամության հուշագրի» ստորագրման արարողությունը: Հուշագիրը ստորագրեցին Մեյզիոյի քաղաքապետ Էրիստոֆ Քինիուն և Հրազդան համայնքի ղեկավար Սևակ Միքայելյանը: Ելույթներով հանդես եկան Մեյզիոյի և Հրազդանի քաղաքապետերը, ինչպես նաև Լիոնում Հայաստանի գլխավոր հյուպատոսը: Վերջինս շնորհավորեց և հաջողություն մաղթեց ֆրանս-հայկական ապակենտրոնացված համագործակցության շրջանակներում նոր ձևավորված բարեկամությանը՝ նշելով, որ գլխավոր հյուպատոսությունը պատրաստ է նպաստել արդյունավետ և առարկայական ծրագրերի իրականացմանը:

Առաջիկա տարիներին Մեյզիոն և Հրազդանը համագործակցության ծրագրեր կձեռնարկեն մշակույթի և սոցիալական ոլորտներում, կխթանեն համայնքների միջև փոխանակումները: Լիոնի քաղաքապետ Գրեգորի Դուսեի և Լիոնի մետրոպոլիայի փոխնախագահ Հելեն Դրոմենի հետ քննարկվել է Մեյզիո-Հրազդան համագործակցությանը աջակցելու հնարավորության հարցը:

Համագործակցության հուշագրի ստորագրման արարողությանը ներկա էին Ռոնից ընտրված պատգամավոր Սառա Տանզիլին, Մեյզիոյի քաղաքային խորհրդի անդամները, Լիոնի մետրոպոլիայի և մետրոպոլիայի տարբեր քաղաքների քաղաքապետեր, քաղաքային խորհրդի անդամներ, հայկական համայնքային և եկեղեցական կառույցների և միությունների ներկայացուցիչներ:

Ֆրանսիա այցելության ընթացքում Հրազդան համայնքի ղեկավար Սևակ Միքայելյանը մասնակցել է Լիոնում, Մեյզիոյում, Վո-ան-Վըլենում և Դեսինում Հայոց ցեղասպանության 109-րդ տարելիցին նվիրված հիշատակի միջոցառումներին:

Երկու քաղաքների միջև համագործակցության կապերի հաստատմանը մեծապես նպաստել է Մեյզիոյի՝ Համերաշխության և մշակույթի հայկական ընկերությունը (AMASC):

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր