Լիոնում Հայաստանի Գլխավոր հյուպատոսությունը մասնակցեց Լիոնի ամենամյա հյուպատոսական տոնին

16 հունիսի, 2024

2024թ. հունիսի 15-16-ին, Լիոնի կենտրոնական Բելկուր հրապարակում (Place Bellecour) Լիոնի քաղաքապետարանի նախաձեռնությամբ անցկացվեց Հյուպատոսական ամենամյա տոնը՝ «Մեր արհեստները և հմտությունները» ընդհանուր խորագրով:

Տոնին մասնակցեցին Լիոնում գործող հյուպատոսություններն ու կազմակերպությունները՝ 50 տաղավարով:

Հայաստանի Գլխավոր հյուպատոսության տաղավարում պաստառների, նկարազարդ ֆրանսերեն լեզվով ալբոմների և հուշանվերների միջոցով ներկայացվեցին հայկական մանրանկարչությունը, ներառյալ՝ «Արցախի և Ուտիքի ձեռագիր ժառանգությունը» ալբոմը, խաչքարերի արվեստը և Ջուղայի խաչքարերի ոչնչացման փաստերը, գորգագործությունը, կավագործությունը, փայտամշակումը, տարազները, ժանյակագործությունը, զարդերը: Լիոնում գործող Մուսկարի ընկերության հետ համագործակցաբար ներկայացվեց հայկական հնագույն կերամիկական հմտություններն ու արվեստը վերականգնող Գյումրու կերամիկան: Ցուցադրվեց Հովհ. Շարամբեյանի անվան ժողովրդական արվեստի թանգարանի «Ինչպես են ստեղծվում արհեստները» անիմացիոն ֆիլմերի շարքը: Առանձին պաստառով ներկայացվեց Թումոն՝ որպես Հայաստանից աշխարհով մեկ տարածվող նորարարական հմտություն:

Պաստառների և ֆիլմի միջոցով այցելուներին են ներկայացվեցին նաև Հայաստանի պատմամշակութային հուշարձաններն ու տեսարժան վայրերը, երկրի զբոսաշրջային գրավչությունը, տրամադրվեցին տեղեկատվական նյութեր Երևանում անցկացվող գինու և Տարազֆեստ ամենամյա փառատոների մասին, ինչպես նաև ազգային խորհրդանիշերով հուշանվերներ: Տաղավարին առանձնահատուկ հմայք էր հաղորդում Լիոնի «Նաիրի» պարախմբի պարուհիների ներկայությունը:

Հունիսի 15-ին, Հայաստանի տաղավար այցելեցին Լիոնի քաղաքապետ Գրեգորի Դուսեն (Grégory DOUCET), վերջինիս տեղակալ Սոնյա Զդորովցոֆը (Sonia ZDOROVTZOFF)՝ քաղաքապետարանի աշխատակիցների, Լիոնում գործող հյուպատոսական կորպուսի դուայեն, Կոտ-դ'Իվուարի Գլխավոր հյուպատոս Լամբեր-Էզոա Ակայի (Lambert-Ezoa AKA) և Գլխավոր քարտուղար, Էստոնիայի պատվո հյուպատոս Հյուգ Պուզեի (Hugues POUZET) ուղեկցությամբ, ինչպես նաև Լիոնի մետրոպոլիայի փոխնախագահ Հելեն Դյուվիվիե-Դրոմենը (Hélène DUVIVIER-DROMAIN), Վիլյորբանի քաղաքային խորհրդի անդամ Իկլեֆ Շիխը (Iklef CHIKH), Օվերնյ-Ռոն-Ալպեր շրջանի պրեֆեկտի դիվանագիտական խորհրդական Գաել Հուրիե-Բոլատրը (Gaelle HOURRIEZ-BOLATRE), դեսպաններ և հյուպատոսներ:

Տոնի երկու օրերին Հայաստանի տաղավարը մարդաշատ էր և մեծ հետաքրքրություն էր առաջացրել այցելուների շրջանում, որոնց մեջ մեծ թիվ էին կազմում տարբեր երկրներից Լիոն այցելած զբոսաշրջիկները:

Հյուպատոսական տոնի նախորդող օրը՝ հունիսի 14-ին Լիոնի քաղաքապետ Գրեգորի Դուսեի հրավերով քաղաքապետարանում տեղի ունեցավ ընդունելություն, որին մասնակցեցին Ֆրանսիայում հավատարմագրված և տոնի առիթով Լիոն ժամանած դեսպանները և Լիոնի հյուպատոսական կորպուսը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր