Լիոնում քննարկվել են մասնագիտական կրթության ոլորտում ֆրանս-հայկական համագործակցության նոր ծրագրերը

07 ապրիլի, 2025

Ապրիլի 7-ին, Լիոնում գործող Ռոնի մասնագիտական կրթության ընկերությունում (SEPR), որը Ֆրանս-հայկական մասնագիտական կրթության կենտրոնի (CEPFA) պատմական և կարևոր գործընկերն է, տեղի ունեցավ աշխատանքային հանդիպում՝ նվիրված SEPR-ի կողմից համակարգվող IMPROVESAT և MOSAIC ծրագրերին, որոնք ֆինանսավորվում են Եվրոպական հանձնաժողովի կողմից Erasmus+ ծրագրի շրջանակներում:

Հանդիպումը նախագահում էին SEPR նախագահ Քրիստիան Դրոզը և միջազգային դեպարտամենտի տնօրեն Քլեր Շալանդ-Օզունան: Քննարկմանը մասնակցել են Լիոնում Հայաստանի գլխավոր հյուպատոս Նարինե Նիկոլյանը, Հայաստանից ժամանած պատվիրակությունը և SEPR/CEPFA-ի գործընկեր կառույցների ներկայացուցիչները, մասնավորապես՝ ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանը, ՀՀ կրթության, գիտության, մշակույթի և սպորտի նախարարության մասնագիտական կրթության և ուսուցման բաժնի պետ Կարեն Մանուկյանը, CEPFA-ի գլխավոր տնօրեն Գոհար Գրիգորյանը, Գյումրու պետական բժշկական քոլեջի տնօրեն Մարինա Մարտիրոսյանը, Օվերն-Ռոն-Ալպ շրջանի, Լիոնի մետրոպոլիայի, Լիոն քաղաքի միջազգային, այդ թվում՝ Հայաստանի հետ համագործակցության վարչությունների, Ռոքֆելլեր դպրոցի պատասխանատուները և Ռադիո Հայաստանի ներկայացուցիչը։

IMPROVET-AM և MOSAIC նախագծերի շրջանակներում ջանքեր են գործադրվում Հայաստանում մասնագիտական ուսուցման կարողությունների հզորացման ուղղությամբ՝ հենվելով SEPR-ի և CEPFA-ի փորձառության վրա:

Ի տեղեկություն

IMPROVET-AM նախագիծը, որը ֆինանսավորվում է Եվրոպական հանձնաժողովի կողմից Erasmus+ CBVET 2023-ի շրջանակներում և համակարգվում է SEPR-ի կողմից, նախաձեռնություն է, որը նվիրված է Հայաստանում առողջապահության ոլորտում որակավորումների բարձրացմանը՝ հատուկ ուշադրություն դարձնելով ատամնաբուժական պրոթեզավորմանը և անձի խնամքին: Ուսուցման ժամանակակից մեթոդները ինտեգրելով և թվային և էկոլոգիապես մաքուր մոտեցումներ որդեգրելով՝ ծրագիրը ձգտում է վերապատրաստման ծրագրերը հարմարեցնել աշխատաշուկայի ներկայիս և ապագա պահանջներին:

MOSAIC նախագիծը կենտրոնանալու է արվեստի և արհեստների ոլորտի երեք ուղղությունների վրա՝ ավանդական և հազվագյուտ արհեստներ, թանկարժեք մետաղներ և զարդեր, կահույք և փայտ, և դրանց կապերը դիզայնի, արվեստի և արդյունաբերության հետ: MOSAIC-ը նպատակ ունի խթանել երիտասարդների սոցիալական և մասնագիտական ներգրավվածությունը՝ ավելի լավ առաջնորդության և հարմարեցված ուսուցման հնարավորությունների միջոցով:

Ծրագրերը ֆինանսավորվում են Եվրամիության կողմից և համագործակցության լավ հարթակ են հանդիսանում մասնագիտական կրթության ոլորտում գործող եվրոպական, ֆրանսիական և հայկական հաստատությունների միջև:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր